النهارده هنراجع أقوى موبايل من هواوي في السوق المصري حاليًا .. وهو الـHuawei P40 Pro .. بس للأسف الموبايل ده بيجي من غير خدمات جوجل .. فا هل الموبايل ده فيه مُميزات تخليك تشترية وتستغنى عن خدمات جوجل ؟ خصوصًا ان الموبايل فلاج شيب وسعره حوالي 16 ألف جنية !!
سعر الموبايل :-
سعر الموبايل الرسمي للنسخة الوحيدة المتوفرة منه بمساحة تخزين 256 جيجا مع 8 جيجا رام هو 16 الف جنية مصري.
مميزات Huawei P40 Pro :-
- كاميرا خلفية قوية جدًا في كل الوظائف والعدسات
- كاميرا سيلفي رهيبة كتفاصيل
- شاشة Curved عملية في الإستخدام مع حواف قليلة وتصميم شيك
- جودة الشاشة مُمتازة مع معدل تحديث ممتاز
- معالج قوي جدًا يُقدم أداء مُمتاز مُستقر بفضل التناغم بين الهاردوير والسوفت وير
- مستشعر IR مُخصص للتعرف على الوجة بيوفرلك أمان وسرعة زي موبايلات ابل
- شحن عكسي 27 وات وهو سريع جدًا
عيوب Huawei P40 Pro :-
- البطارية متوسطة
- سرعة الشحن عادية
- صوت الموبايل أقل من المنافسين ( بدون ستيريو ! )
- عدم وجود خدمات جوجل واللي تعتبر عيب كبير في الموبايل ده
دي النقطة المحورية اللي تخليك تشتريه ولا لا .. على حسب إستخدامك انت.
مواصفات الهاتفHuawei P40 Pro :-
- شاشة بتيجي بحجم 6.58 بوصة من نوع OLED بدقة 1200×2640 .. وهي دقة أعلى من الـFHD+ وأقل من QHD+، حاجه في النص كده .. والشاشة بتدعم معدل تحديث 90 هيرتز علشان يديلك سلاسة إستخدام أكتر بس خلينا نتكلم عليها كمان شوية.
- الموبايل جاي بمعالج هواوي الرائد الكيرين 990 بتكنولوجيا 7 نانو .. المعالج الداعم لشبكات الجيل الخامس .. وحقيقي ده مش أقوى معالج في العالم دلوقتي على مستوى الأندرويد .. الـSnap Dragon 865G أقوى.
- البصمة مُدمجة في الشاشة بس مكانها فوق شوية .. بس لما تاخد على مكانها فا هي سريعة جدًا ومستحيل تغلط معاك.
- اما بقى الـFace Unlock بقى بيعتمد على مستشعر IR الموجود في ثُقب السيلفي .. وطيارة حرفيًا وكمان الموبايل بيتعرف على وجهك في الظلمة بفضل مستشعر الـIR.
- الموبايل ده فيه بعض الـGestures اللذيذة اللي بتعتمد على الـSensors الموجودة في قطع الشاشة .. أهمها إنك من بعيد ممكن تاخد سكرين شوت .. او ممكن تقلب في حاجه إنت فاتحها وتعمل Scroll لتحت ولفوق .. حاجات عظمة جدًا بصراحة.
- ومفيش سماعة مكالمات .. الصوت بيطلع بموجات من تحت الشاشة .. كنت حاسس إن الصوت هيبقى واطي .. بس بصراحة الصوت كان ممتاز وسامع اللي بكلمه كويس جدًا.
- بطارية مش ضخمة .. بتيجي بحجم 4200 مللي أمبير .. بتديلك إستخدام متوسط 6 ساعات بس
وبالنسبة للأداء الرسومي فالموبايل بيشغل لعبة PUBG على Ultra HDR واللعبة بتشتغل كويس جدًا ومفيش اي مشاكل .. ولعبة Call Of Duty بتشتغل برده على Very High وشغاله بدون أي مشاكل .. اما لعبة Fortnite فا هي شغالة على إعدادات جرافيك High وبتشتغل كويس بدون أي مشاكل.
